Oleh: myst | Februari 14, 2008

Cerita der Manado

Manado, Sulut Bosami Network

Tabea se katuari waya,

Ni tulisan kita anggap catatan akhir tahun. Kita coba
usaha for tangka tu gejala, mungkin stou fakta di
masyarakat, kong kemudian berbage di milis for orang
laeng yang tantu katu tertarik. Silahkan ngoni yang
berminat untuk ber-mapalus bersama-sama, mengkritisi
dan kase saran. Torang baku beking pande.

Kita baku dapa deng seorang anggota dewan provinsi di
sebuah pertokoan. Sementara batunggu maitua bablanja,
torang mulai babacirita. Muncul seorang mantan kepala
dinas yang dinamis, masih muda dan punya akses sampe
di departemen, maar ada bakustrekel sadiki deng
manguni 1, kong dinonjobkan.

Kita mulai dengan bacirita deng tu anggota dewan.
Orang batanya kiapa mulai dari anggota dewan? Karena
dorang punya fungsi penting sebagai pemerintah pe par.

Pa anggota dewan, kita batanya.
Nyanda iko studi banding ?
Dia jawab, ado so pastiu iko studi banding.

Kebanyakan waktu di studi banding, cuma pasiar. Kalu
pun torang ambe data depe pertanggungjawaban di dewan,
amper nyanda ada. Paling tu laporan 1 beking tekeng,
kase maso, jadi laporan tertulis. Mujur kalu dong baca
lei.

Sebab dewan cuma siklus 5 tahunan. Abis masa tugas,
mulai lagi deng dewan baru dengan selera yang berbeda.
Maar depe suasana utama (mainstream) tetap studi
bandinnnng. Sampe disini percakapan tentang studi
banding deng tu anggota dewan.

Dulu, studi banding cuma sebatas dalam negeri. Maar
skarang, studi banding so lewat batas negara. Jadi
perlu paspor, bayar fiskal, blum lei doi tiket yang
mahal.

Kali akang jo 45 anggota dewan provinsi, tambah 13
kota dan kabupaten yang jumlah anggota dewan sekitar
20 sampe 25 orang.

No tu studi banding dirancang oleh dinas di provinsi,
kota dan kabupaten kemudian diserahkan ke dewan. Jadi
dorang baku tongka.

Bahkan disinyalir itu studi banding, jadi alat baku
blante. Dewan kase lolos tu anggaran, di APBD, maar
dorang musti dapa kase pasiar. Kalu perlu deng
bini-bini baku iko.

Pokoknya tu turis biaya negara di masa desentralisasi,
otonomi daerah so dapa tako.

Abis itu, coba torang tanya depe pertanggungjawaban
terhadap hasil studi banding. Sapa yang bole kontrol
pa anggota dewan?

Pada hakikatnya semua anggota dewan depe hak. Cuma
alat kelengkapan dewan yang membagi tugas, ketua,
wakil, ketua komisi dan sebagainya.

Bayangkan jo berapa uang yang taambor di dewan?
Blum lagi tu anggota dewan kalu dia baproyek. Lewat
orang lain, ato urusan partai. Tamang, tu kepala dinas
sampe bingo mo berbage bagimana tu proyek, kalu dorang
so minta langsung.

Berani nyanda kase, waktu hearing, dorang se
batlanjang tu pejabat? Picya-picya !

Maar ado jo tu kepala dinas yang brani, baku tantang
baku batalanjang di dewan. Tamang, tako jo tu anggota
dewan.

Memang harus diakui, ada jo no tu anggota dewan yang
bekerja butul, maar dorang cuma itong deng jare. Depe
lebe cuma menumpang hidop.

Pertanggungjawaban publik nyanda ada sama sekali.
Siklus ini terjadi setiap 5 tahunan.

Waktu kampanye, oh ma ma, tu janji dapa tako. Simak jo
tu janji kampanye. Kita bacalon anggota dewan cuma for
pengabdian, nyanda ada laen! Nyanda lama setelah
dilantik, taputyar tu janji.

Sama dengan keadaan pemilihan gubernur, bupati deng
walikota. Samua janji mensejahterakan rakyat. Maar
depe bukti sampe habis masa jabatan 2 periode, rakyat
tetap susah. Ternyata yang sejahtera diri sendiri,
keluarga, anak-anak, deng tu sudara-sudara. Korupsi
merajalelah.

Kita pe komentar, torang pe pejabat di daerah banyak
yang menang aksi, tapi kinerja sulit diukur karna
meraya bebe.

Ada juga yang sibuk dengan membangun image, membangun
rumah, beli kobong (batambah), menebar pesona. Dapa
tako tu penghargaan dong ja terima, maar depe cost for
terima tu penghargaan milyar lei tamang.

Torang pe pemerintah daerah pe gaya memang nyanda ada
lawang.

Amper samua kepala dinas/badan pake Nissan Extrail,
Terano, Ford Escape, Everest. Kepala daerah pake
Fortuner, LC, Jeep Cheeroke.

Katanya mo bahemat. Jarak tempuh perjalanan cuma dalam
kota 30 sampe 40 km, dorang pake kendaraan ber-cc
besar. Jadi, bukang maeng depe boros itu BBM.
Bertentangan deng dorang pe pidato menghemat energi.

Kalu ada rombongan pejabat menteri apalagi RI 1 ato 2,
oh mama dapa tako tu rombongan. Sosadiki kalu 50 oto
tu baku ekor.

Belum tu makang, konsumsi for keamanan, depe kado,
ole-ole for dayang-dayang.

Rakyat dorang suruh bahemat ukur mampos, maar pejabat
bole boros energi.

No, mo sambut ini pejabat, samua musti deng baju
bagus, kalu bole baru.

Dulu waktu RI 1 berkunjung di satu kabupaten, itu
rumah bupati dapa suru ganti depe kaca rumah deng kaca
anti peluru. Karena ini perintah, musti iko akang.
Ternyata hele singgah nyanda. Berapa jo tu harga ganti
kaca anti peluru. Blum persiapan kamar tamu.

Tu tamang anggota dewan pe komentar, torang bukang
tambah makmur, maar tambah susah tu rakyat.

Pujian dapa tako, maar rakyat so minta-minta ampung.
Pejabat mandi pujian, rakyat mandi darah.

Mana tu crash program pe kemajuan? Milu, dorang bilang
memilukan!

Rumput laut, ya tamang so nyanda ada depe berita.

VCO, cuma rame di pemberitaan pertama waktu dilantik,
maar skarang so amper nya dapa dengar. Mungkin so
tasangko di karang stou lei,…

Agriculture,.. ya do..do. Tu rame cuma perdagangan
tradisional, jual rica, tamate, batang bawang, kol,
kacang panjang. Dari Modoinding, Tompaso, Tomohon ba
pinda di pasar 8, Jengki, ato pasar Kilat Bahu.

Coba kua pemerintah beking kuat akang tu komoditi
andalan. Perikanan kase maju akang kasana.

Sebagian rakyat Sulut yang tinggal di pesisir pantai
berprofesi sebagai nelayan. Maar dorang pe nasib, baba
gitu jo.

Dapa hari ini, abis ini hari.
Yang menikmati pengusaha besar. Dorang tu mainkan
harga, pendapatan deng juta tiap hari. Nelayan kasiang
cuma abis bayar bon di warong.

Pabrik ikan di Bitung ja mengeluh habis bahan baku,
padahal fishing ground paling besar ada di laut
Sulawesi.

Bagimana mungkin dengan potensi perikanan yang besar,
sampe mo abis akang bahan baku. Tu pabrik riki tutu,
buruh tabiar nya dapa bayar pesanggon. So talalu
komang ini cerita. So cigulu-cigulu.

Dulu pak Harto resmikan tu pabrik pengalengan ikan
termegah di Indonesia waktu itu, depe biaya sekitar 35
milyar waktu doi rupiah masih berharga. Nya reken
tahong, tu pabrik so plaka. Depe pengusaha
kasana-kamari nae BMW. Hele tu bank finansiring
tabobale. Ternyata tu doi dorang kase baputar di tanah
for bandara Sam Ratulangi. Memang caparuni ni orang
Jakarta.

Bagitu lei tu kapal ikan. Ternyata tu kapal ikang,
banyak pake nama lokal, maar operator besar di pusat.

Kong dorang so nyanda cek point di Bitung waktu abis
batangka ikang, maar langsung baku jual deng pembeli
di tengah lao, langsung ke General Santos, Davao yang
memang banyak perusahaan pengalengan ikan basar,
dengan mafia perdagangan perikanan.

Ya, bagimana dang tu jabajaga di lao, nyanda mampu
stou tu keker mo lia, ator memang kurang tu kapal
patroli sampe gampang ja lolos tu kapal ikan.

Lia akang kua tu pertanian lei. Kentang Modoinding
depe prospek bagus. Potensi pasar kentang besar, maar
berdayakan tu petani kentang di Modoinding.

Dulu so beking tu pabrik pengolahan kentang modern,
sampe jadi model chips yang kualitas bagus, bole lei
mo kape di kentucky kalu nya salah bole mo ekspor.

Maar, ternyata depe doi investor ya doi yang tete
manis larang, hasil korupsi.

Brapa lama lei, dong loku depe orang, sampe depe
pabrik dorang so obral di Kejaksaan di Manado skarang,
karena disita oleh negara. Depe orang ngoni so tahu
komang.

Banyak sebenarnya tu torang pe potensi. Pabrik tepung
ikan, tepung kelapa (decicated coconut).

Di Manembo-nembo ada tu pabrik tepung kelapa, juga
Aermadid. Afiliasi dengan Jaka group Philippine. Kalu
nya salah waktu itu depe Presiden Enrile, sampe Fidel
Ramos ada datang di Bitung.

Maar sekrang tu pabrik itu, so taplaka. Padahal buyer
untuk tepung kelapa, banya di mancanegara.

Masalah Cingke.

Gappri (organisasi pengusaha rokok) mengakui, cingke
Minahasa (si kotok, kalu nya salah depe nama en
banyak di Tondano,) punya kualitas terbaik. Jadi
peluang pasarnya, terbuka lebar.

Waktu Gus Dur jadi presiden, depe harga cingke nae
sampe 85 ribu/harga per kilo. Maar abis itu turun
jaha-jaha.

Ternyata tata niaga cingke ada mafianya. Tahan
pembelian dalam negeri, kong kase maso cingke impor
Madagaskar. Paksa Gappri musti beli, simpan pa dorang
pe gudang.

Jadi katu, cingke Minahasa langsung tabrenti depe
pembelian, harga turun, over supply katanya.

Jadi, pemerintah musti kua ator bagus-bagos. Jang
stenga main mafia. Pemda berjuang supaya tata niaga
cingke ta ator bae-bae, kase keutungan for rakyat.
Kong Inkud deng TS kase pulang tu dana yang dorang ada
potong (rehabilitasi cingke) pa petani cingke Minahasa
waktu BPPC lalu. Depe jumlah ratusan milyar kalu itong
depe bunga.

Cingke so jadi komoditi andalan, mayoritas rakyat
Minahasa dan sekitarnya. Kalau cingke depe harga
bagus, rakyat banapas bagus lei.

Waktu kampanye gubernur, ada no tu calon bajanji for
cingke, maar mana so nyanda dapa dengar depe berita.

Demikian deng Pala en Kopra. Petani Pala deng Kopra
juga pemerintah bantu supaya depe harga, pasaran
terbuka. Kong rakyat hidop bagus lei.

Oh soal Vanili.
Tu Vanili Bali yang buyer luar jaga puji, sebenarnya
itu Vanili eks Sulut, depe kobong di Ratahan banyak.
Maar tu mafia perdagangan Vanili lei dapa tako. Kalau
nyanda iko dorang ato depe broker, susah mo dapa tu
pasar deng harga bagus.

Ni rakyat petani Vanili, karena kesulitan ekonomi,
dorang pete muda tu Vanili. Langsung depe harga turun,
depe grade jadi ta iko turun lei.
Papancuri Vanili jadi banya lei. Dulu di Manado, ada 2
pabrik pengolahan Vanili yang kita kenal. Tu satu bank
Exim yang danai, kage karena apa stou langsung
taplaka. Padahal tu aroma Vanili Minahasa so terkenal
di dunia. Skarang kurang cirita tu ta tinggal. Depe
bobou so susah mo dapa ciong.

Benahi kua lei tu pariwisata. Ini sektor cukup
menjanjikan for torang. Cuma kua depe penganggaran di
APBD, lebe banyak abis di sepak bola. Jadi bagimana mo
bangun kalu depe doi nyanda ada. Terpaksa pejabat
bajanji pancar luda jo kong mo berhasil.

Tu akses beking akang, objek diperlihara tambah
fasilitas. Ator depe wc. Jang komang rumah dinas
pejabat atau kobong pribadi lebe gampang mo cari,
karena didukung APBD dari pada turis mo ke lokasi
wisata. So talalu komang itu.

Lia jo tu Rurukan (om Dolf Ratulangi pe tampa), lebe
banyak pake doi pribadi. Padahal bole jadi objek
wisata for bule. Samua menunjang, apalagi Dolf
Ratulangi mahir di bidang itu. (Bole to bapuji pa
tamang sandiri).

Investasi.

For mo tunjang investasi samua baku malendong. Maar
lengkali so tumpang tindih. Ada Kapet Manado Bitung
deng Badan Koordinasi Penanaman Modal Regional
(BKPMR). Depe tugas ini dua badan amper sama. Kiapa
kua nya beking satu atap jo, supaya bole menghemat
operasional.

Baru mo bayar tu direktur, advisor. Blum dorang pe
perjalanan ke luar negeri.

Kalu jaga baku sedu, kurang pi bulan tu dorang blum
road show akang.

Maar kasiang, tu realisasi investasi sadiki. Nentau
lei, dimana depe salah. Birokrat kah ato memang torang
pe daerah so nyanda menarik for investor.

Soal MSM. Baku tarek soal tambang MSM memang
susah-susah gampang. Nyanda salah keprihatinan para
aktivis lingkungan terutama soal tailing, maar jang
salah, tu rakyat lei so perlu lapangan kerja.
Kebutuhan perut, nyanda mungkin ditawar-tawar.

Torang musti akui, bagitu tambang maso di Ratotok, tu
daerah Ratatotok, Belang dan sekitarnya tabuka dapa
tako.

Kampung jadi rupa kota. Fasilitas sosial dibangun.
Pendidikan maju, rakyat tatawa. Efek berantai yang
ditimbulkan oleh NMR torang musti akui.

Kita bukang berati mo tutup mata bahwa ada kerusasakan
lingkungan hidup. Maar tu kesejahteraan rakyat Minahsa
waktu itu nae jaha. Jadi, mo bagimana torang, rakyat
bilang sanang.

Ini aktivis kua lei, lengkali jadi alat for mo beking
rusak tu keadaan. Skrang sapa mo kase makang tu
rakyat. Rakyat lapar tamang.

Skarang MSM so dapa ijin KK dari pemerintah pusat,
kalu kase batal tamang, dorang bawa di arbitrase
international. Ratusan juta dollar amerika dorang pe
tuntutan.

Jadi, baitong bae-bae. Kong inga lei, rakyat bole
berontak kalu so lapar. Begitu lapangan kerja tatutup,
rakyat marontak nentau tako.

Hu, polisi lagi komang tu musti baku sapu deng rakyat.
Masi bagus kalu cuma baku dusu, kong dapa skop deng
lars. Maar kalu tu dodorobe so babunyi, kasiang tu
rakyat. For keamanan, akhirnya suasana sonya baku
tahu lei.
Kalu ini jadi, so 2 kali Sulut menjadi contoh daerah
yang tidak ramah terhadap investor pertambangan.

Padahal torang babataria, cari investor di luar
negeri.

Petinggi bilang ramah lingkungan, polusi udara di
dalam kota Manado stou lebe tinggi dari di daerah
pertambangan.

Bole juga lia, tu kerusakan hutan di Minhasa lebe
banyak disebabkan oleh keserakahan pejabat, deng ada
rakyat yang karena mo cari makan, dari pada kerusakan
alam oleh pertambangan.

Pokoknya sadia kompensasi jo for rakyat, kalu mo jaga
itu lingkungan. Kalu nyanda, rakyat bapikir pendek.
Makan sekarang, gampang tu lingkungan. Ini fakta yang
sementara torang hadapi.

Mungkin kita bapikir, torang ekspor jo tu komoditi
yang jelas-jelas depe pasar. Misalnya sayur dan
hortikultura antar provinsi. Rumah panggung antar
provinsi.

Ini rumah panggung lei ada depe cerita. Karena itu
hukum jaga baku tasangko, jadi tu pengusaha rumah
panggung, jaga dapa susah lei.

Dorang so isi di kontainer siap ekspor, di perjalanan
polisi loku, tanya dokumen kayu, ekspor.

Menurut pengusaha so lengkap, maar polisi bilang belum
lengkap. Jadi kontainer, dorang tahan.

Kasiang, tu pengusaha so terikat kontrak dengan buyer,
shipping line, sewa kontainer, truk.

Akhirnya, dorang rugi. Jadi dorang demo di polisi,
koordinasi antar instansi baru kontainer dapa kaluar.
Maar so rugi.

Soal cap tikus.
Cap tikus torang mo marah atau nyanda, mo binci karena
banyak orang mabo, maar so jadi salah salah penggerak
ekonomi rakyat, khususnya di Minahasa Selatan.

Ini cap tikus kalu cuma for tambah napsu makang,
memang bagus. Cuma, banyak kali komang, bukang cuma
napsu makang tu nae, hele tu emosi, darah tinggi baku
iko nae.

Kriminalitas di Sulut tertinggi disebabkan oleh
pengaruh Alkohol.

Banyak usaha yang dilakukan untuk mengendalikan cap
tikus. Beking pembatasan, maar kalu talalu ketat,
kasiang tu petani cap tikus. Banyak orang yang jadi
sarjana, guru besar, pendeta, jaksa bahkan polisi
karena depe orang tua batifar saguer deng tukang
beking deng jual cap tikus.

So ada tare jalan kaluar yakni Pabrik Gula Aren di
Tomohon. Cuma karena Syeni Watulangkouw dan Willi
Smith depe laki, dorang jaga bage dari sisi politik,
kasiang tu pabrik jadi bulan-bulanan pemberitaan
koran.

Bae jo skarang so teduh depe pemberitaan. Pemerintah
kua coba cari jalan keluar, kong bantu akang ini
Pabrik Gula Aren supaya tu petani Saguer, Cap Tikus
ada penyerapan. Kalu nyanda penyalahgunaan cap tikus
somo lebe hebat.

So pe banyak orang ada mati konyol deng cap tikus
karena salah pake.

Orang Manado yang so jadi alias tabae
Musi akui, banyak tu kawanua yang berhasil di
pemerintahan, militer dan bisnis.

Coba kua bapikir beking sesuatu for kampung halaman.

Beking kegiatan untuk pelatihan ketrampilan.

Kase contoh Ibu Markadi Tambuwun, beking Balai Latihan
Kerja di Sonder. Orang bole belajar macam-macam
ketrampilan (terutama ketrampilan wanita).

Ronal Korompis beking skolah SMU Lokon di Tomohon. Ni
skolah salah satu skolah swasta terbaik di Sulut.
Dari Freeport kase bea siswa anak Papua, for mo
belajar di SMU Lokon.

Billy Kumolontang, beking Manado International School.
Ni skolah jadi barometer pendidikan swasta di Manado
dan sekitarnya.

Johny Lumintang, bagitu klar pensiun beking usaha
perikanan darat di Ratahan dan sekitarnya. Juga
mengkoordinir kegiatan musik bambu

Gubernur Maengket Benny Mamoto, beking kegiatan untuk
membangun kesenian dan kebudayaan di Sulut.

Kumtua Joseph Karamoy mengkoordinir Sulut Bosami
Network for tampa baku dapa, diskusi pikiran-pikiran,
baku beking pande. Mari jo kua torang baku tunjang,
nyanda usah mo baku cungkel.

Tante Lani dan om Sugandhi mo beking Arini Marine
Research Center bahkan mo hibah tu tanah (kalu nya
salah) demi kemajuan marine science di Sulut.
(ini yang kita ada pantau, kalu ada laeng undangan
nanti kita tulis depe informasi, masih freei kua, yang
penting dapa kopi, dengan depe salinan atau tambahan
rupa biapong Kawangkoan ha ha ha )

Sapa menyusul ?
Inga falsafah papa ani, Si Tou Timou Tumou Tou.

Cita-citaku sampe puncak Klabat, apadaya kaki cuma
sampe di Aermadidi.

Katuari waya, kita so banya ba ober. Kalu nyanda
berkenan minta maaf. Maar ini no kita pe pendapat,
riki hosa ada tulis.

Smoga jo, ada manfaat biar cuma sadiki. Sengaja tulis
pake bahasa Manado pasar, cuma mo kase inga pa tu
sudara-sudara di Amerika, Eropa, Australia, Canada
agar kalu bole, jaga bacirita denga tu kodomo pake
bahasa Manado. Spaya kalu pulang Manado, dia nyanda
kage deng bahasa lokal.

Kalu mo kursus mahal, ini tree cuma gratis,… alias
freei.

Katuari waya,….
Maleo-leosan
Malinga-lingaan
Matombol-tombolan
Maesa-esaan
Masawang-sawangan

Smokol pagi ato, camu-camu diskusi siang for torang
samua.
Makase,
Christy dan keluarga (1 bini, 2 kodomo)

Iklan

Tinggalkan Balasan

Please log in using one of these methods to post your comment:

Logo WordPress.com

You are commenting using your WordPress.com account. Logout /  Ubah )

Foto Google+

You are commenting using your Google+ account. Logout /  Ubah )

Gambar Twitter

You are commenting using your Twitter account. Logout /  Ubah )

Foto Facebook

You are commenting using your Facebook account. Logout /  Ubah )

w

Connecting to %s

Kategori

Iklan
%d blogger menyukai ini: