Oleh: myst | Februari 14, 2008

Cerita der Manado 2

Tabea se katuari waya (bagian kadua)

Makase banya atas response pa kita pe 2 tulisan
sebelumnya. Ada yang ba email, balas di milis, ada lei
tu ba telpon, ba usul beking blog, web. Samua katu
bagus, cuma komang cawana roit kalu somo beking blog
ato web. Memang kita mo suka tutu taon 2007 deng
tulisan refleksi dalam bahasa Manado. Ini jo tu kita
bole beking, yang penting ada tatamba informasi for tu
di luar negeri. Skalagi makase banya, ma
sawang-sawangan, mo tombol-tombolan, ma leos-leosan,
ma linga-lingaan, ma esa-esaan.

Pendidikan:

Kalu kita lia tu balasan, banya orang membahas dari
segi pendidikan. Ini memang butul, apalei kalu lia
sejarah pendidikan di Sulut, terutama di Minahasa
sejak ratusan taon lalu memang maju. Ada data bilang
pada tahun 1617, di Minahasa so ada skolah. Tahun
1730, di Manado so punya 12 guru, 9 orang pembantu
guru. Ini depe jumlah skolah ditaon 1919, 282 skolah.
Jang lupa tamang waktu itu, belum ada SD Inpres.
Torang orang Minahasa so sangat maju dalan pendidikan.

Taon 1885, DR. W.R. van oevelHi Hoevel baku dapa deng
orang Minahasa tamatan skolah Belanda yakni, Outford
Pelengkahu deng Joost Tambayong (18 tahun). Dorang dua
jago diskusi pake bahasa Belanda (ukuran intelektual)
kong dong kuasai lei tu sejarah Eropa. Memang ini bule
mati-mati heran, ni binyo memang pande-pande. Dia lei
langsung seturung keve. Trus nyanda baku pandang
enteng.

Taon 1896 so ada 130 sekolah lengkap deng depe kepala
sekolah orang Minahasa.

Taon 1872 torang ada orang Minahasa yang lulus sekolah
kedokteran dorang penama, doktor Mononutu kelahiran
Maumbi, deng dokter Rotinsulu kelahiran Kolongan,
Tonsea. Tu Walanda so mulai ba kuai-kuai kalu bicara
deng orang Minahasa, karna so pe banya tu pande-pande
mulai dari administrasi sampe pendidikan.

Depe kemajuan laeng karna tu pendidikan yaitu, pada
taon 1913, so ada 4000 orang Minahasa yang tekeng jadi
soldado. Bayangkan jo tamang di taon torang ada 4000
soldado brani, bukang tu panako.

Jadi pe banya orang Manado yang berkarir di militer
(banya ada di Sulut Bosami network) kong itu amat
membanggakan.

Skadar ta mo kase inga tu dokter-dokter orang Minahasa
tamatan skolah dokter di Jawa :

Dr. Samuel Ratumbuisan orang Tataaran (tamat 1872)
Dr. Israel Iroot orang Langouwan (tamat 1872)
Dr. Walalangi orang Tondano (tamat 1872 )
Dr. Pelengkahu orang Aermadidi (tamat 1872)
Dr. Runtuwene orang Maumbi (tamat 1874)
Dr. Pangemanan orang Aermadidi (tamat 1875)
Dr. Elias Montung orang Sawangan Tonsea (tamat 1878)
Dr. Dotulong orang Amurang (tamat 1880)
Dr. B.J. Th. Umboh orang Kabila Gorontalo (tamat
1884)
Dr. J. Emor orang Gorontalo (tamat 1884) dapat bintang
jasa dari Blanda
Dr. Andries orang Tanawangko (tamat 1898)

Orang Minahasa tamatan sekolah dokter Stovia

Dr. Kalangi orang Remboken
Dr. Ph. Laoh orang Amurang
Dr. J.E. Rompis orang Amurang jadi dokter KPM
Dr. R. Tumbelaka orang Amurang
Dr. J.A.J. Kawilarang orang Tondano
Dr. B.A.S. Gerungan, orang Gorontalo
Dr. Tangkou orang Gorontalo
Dr. Lumentut orang Kwandang
Dr. Ch. Singal orang Aermadidi
Dr. A.B. Andu orang Manado
Dr. B.F. Rotty orang Aermadidi
Dr. Andries Lumanauw orang Tondano
Dr. D.M. Pesik orang Amurang
Dr. J.F. Matuli orang Mangelang
Dr. A. Tilaar orang Tondano
Dr. A.H. Makaliwe orang Tondano
Dr. T.A. Kandouw, orang Ternate meraih gelar DOKTOR di
LEIDEN Belanda. Orang Indonesia pertama mengajar di
fakultas kedokteran di Amsterdam
Dr. Victor Ratumbuisang ahli jiwa (menjadi nama rumah
sakit (jiwa) di jalan Bethesda, Manado
Dr. E.J. Karamoy orang Manado, ahli bedah
Dr. Anna Warouw, dokter wanita kedua di Indonesia depe
laki dokter J. Karamoy
Dr. S. F. Warouw orang Amurang
Dr. R.D. Kandou (menjadi nama RS Umum Pusat di
Malalayang)
Dr. H.A. Abuthan orang Manado
Dr. J.L. Makalew jadi guru besar di Unhas
Dr. R.C.L Senduk jadi dokter tentara pangkal Letkol

Berikutnya Lambertus Nicolas Palar (dipanggil om Babe)
dengan pidatonya pada tanggal 24 Januari di depan
Dewan Keamanan PBB di Nw York memaksa Belanda
mengembalikan pembesan Indonesia seperti Ir. Soekarno
dan Sam Ratulangi ke Jogja.

Karir diplomatik Lambertus Nicola Palar adalah Dubes
Indonesia di India, 1953 di Uni Soviet 1956, dan PBB
1962

Ir. H. Laoh tamatan ITB menteri PU
Ir. Warouw, jadi perwira Zeni TNI AD
Ir. F.J. Ingkiriwang tamatan Delft Belanda menteri
Perindustrian
Ir. Elias D. Dengah ahli pembangunan jalan dan
pelabuhan menteri PU taon 1947

Meester in de Rechten (sarjana hukum Leiden Belanda)
Alexander Andries Maramis pada 25 September 1945
menjadi Menteri Keuangan (masuk MURI) yang mematok
harga 10 gram emas sama dengan 1 rupiah Indonesia
(bisa dikoreksi). Dubes RI di Philippine, Jerman Barat
dan Uni Soviet.

Salah satu kita pe tamang yang ada lanjutkan karir
diplomatik yaitu Harry James Kandou, skarang lagi
posisi di Nairobi-Kenya, Afrika. Nentau e kalu so
promosi ka laeng tampa.

Tamatan fakultas Hukum Leiden lainnya adalah :
Mr. H. Lefrandt (Leiden 1924)
Mr. Leon Makaliwe
Mr. Coenrad Ranti
Mr. Teng Tjin Leng guru besar di Unhas
Mr. S. Pelengkahu, Menteri Sosial kabinet Pertama NIT
Mr. A. Maengkom Menteri Kehakiman, dubes RI di
Polandia

Mrs. Annie Manopo, wanita Minahasa pertama yang
bergelar sarjana hukum, dekan fakultas hukum di Medan
dengan nama Ny. Annie Abbas-Manopo.

(Dikutip dari Sumber : Sejarah dan Kebudayaan
Minahasa, ditulis oleh Jessy Wenas).
Saya berterima kasih dan hormat setinggi-tingginya
kepada om Jessy atas karyanya ini.)

Kita sengaja ungkit ulang ini masa keemasan Minahasa,
spaya torang tabuka mata, kong sadar torang so
tatinggal pe jao. Torang samua musti bangon, kong dusu
ulang tu ketinggalan, spaya torang nyanda gampang
orang laeng beking bodok.

Nya ada maksud laeng, Cuma itu. Karna kalu mo lia
torang keadaan belakangan ini, kasiang torang tou
Minahasa, lengkali dorang so nyanda ja itong pa
torang. Dorang kurang lia deng mata sablah.

Banya torang pe salah, sampe musti tatinggal bagini.
Apalei tu pemerenta skarang samua musti tunggu dari
pusat, sampe orang bilang tu otonomi daerah sama deng
lapas di kapala, maar injang di ekor. Dorang bilang
itu sama deng takoa.

Bagitu lei mo jadi tantara deng polisi.
Banya no tu nyong-nyong orang Manado mo suka jadi
soldado deng polisi. Maar bagitu tes kesehatan, ya tre
tu dada so adaflek dapa lia di hasil rontsen.
Samua ini karna cap tikus pe karja deng pang ba isap
rokok.

Tu jata orang Manado di soldado deng polisi, orang
luar jaga pake skarang. Kita so perna riki, bagimana
tu orang baru stou tiga bulan tinggal di Manado, jaga
ba urus KTP mangaku orang daerah for mo iko tes Caba.
Apa bole buat, dorang lei pe jaringan so pe banya.
Jadi lebe tamba tatutu.

Depe lanjutan tu tingkatan kualitas pendidikan ada
depe kelompok :

1. Berpendidikan deng berkualitas mantap. Golongan ini
banya yang tapancar di luar daerah. Cukup banya yang
lulusan sekolah Advent (Unklab), karja di bagian
accounting, marketing kalu nyanda salah.

Dorang so dapa kedudukan bagus so ta stel di luar. Ada
di Jakarta, Surabaya, Makassar, Batam, Papua,
Balikpapan, Bali sampe di Sumatera (NAD). Ada tre so
sampe di luar negeri, Australia, New Zealand, Belanda,
USA, UK, Singapore.

Dorang katu jadi, karena memang dapa pendidikan yang
bae di kampung kong suka belajar lei. Ada tamang karja
di Holland American Line so belasan taong, dapa bini
orang Philippine. Ini katu tu contoh orang Manado yang
sukses di luar.
So susah for dorang ini mo pulang kampung, karna tu
blanga deng tampa bapacol ada disana. Jadi biar jo
dorang ba tumani di sana.

2. Berpendidikan deng kualitas sedang. Dorang ini
banya yang sementara berkarir di Manado. Sabanarnya
dorang mampu berkembang, maar komang tu kesempatan
sadiki susah. No tu Manado kua brapa basar. Dari
Pineleng sampe Molas di ujung Tuminting, brapa jao
kua? Dari Kalasey sampe Kairagi so kalar baron tu
Manado.

3. Berpendidikan dengan kualitas pemula. Dorang ini no
tu jaga maso lapangan kerja lokal deng modal pas-pas.
Yang penting so tau karja kong ada hambak.

Catatan :
Kita jaga bapikir, kalu samua orang Manado,
Minahasa,yang pande dan bermutu kaluar daerah, kong tu
di Manado, Minahasa dan sekitarnya sapa lei mo jaga.
Mambao?

Sedangkan torang masi ada jaga, tu orang ada maso
skarang di Manado, Minahasa dan sekitarnya so nya ada
nat. Ada te tu kampung-kampung tertentu yang depe
ratio, so dorang lebe banya. Masi bagus kalu dorang
beking barang bae, maar kalu dorang lei banakal, bole
susa lei torang tamang. Kejadian bagini so banya
contoh. Untung jo, Sulut sulit di sulut. Deng itu
karna tete manis diatas masi sayang pa torang. Kalu
nyanda tamang, ta so nentau mo jadi apa lei!

Lia jo waktu penataan PKL, ada orang kurang jaga
branak di tampa bajual, di los pasar. Pasang tenda,
kong badaseng. Pertama bajual, kage so ba tinggal,
kong so susah mo ator, dorang kurang mo malawang.
Jadi, apa tu walikota Imba ada beking, do dapa lia
katu depe hasil. Dulu kalu mo pi pasar 45, tu copet
tuang ngampung so kiri kanan. Tu oma deng opa dari
gunung banya jadi korban. Kasiang tong pe oma deng
opa, dulu tu bendar jadi ukuran Manado. Kalu so injang
Bendar, so makang di biapong di wayang, wangala so
rasa bangga. Maar tu bendar kurang bobou busu. Cuma
skarang katu, so ta ator, bersih, ramah, deng so sadap
mata mo lia. Musti bilang makase pa walikota Imba.

Brani komang ni laki-laki. Waktu PKL mo demo, Dia
bilang depe urat tako so putus, jadi demo jo, nanti
dia mangada. Ei ngoni tau, cibubu jo dorang. Bapikir
lei dorang, baku dapa deng orang cap mau bagini. Maar,
komang skarang so aman, reda. Dorang lei katu so
sadar, tu bersih sadap lei mo lia.

Lapangan kerja :

Skarang tre, di Manado, Minahasa (enteru) so mulai
tabuka karna ada permintaan TKI. Negara penerima rupa
Singapore, Taiwan, Korea, Jepang dan ta dengar Belanda
lei mo suka trima.

Singapore, Taiwan jadi maid, dorang pilih orang
Minahasa karna banya kesamaan. Susa kua mo bedakan,
mana china deng mana orang Manado. Depe kuli, mata
cipit banya sama.

Di Minahasa, ada jaga bilang Cina Tondano, Cina
Amurang, Cina Tomohon. Maar komang, nyanda ada tu
orang bilang Cina Sonder. Ngoni tau kiapa ? tu orang
Sonder, depe hemat kala kua orang Cina. Dorang jaga
bilang koncudu kata. Orang laeng bilang Turki alia
(turunan kikir, he he he baku sedu komang itu). Tu roa
dorang cuma colo di kua trang, abis itu angka ulang tu
roa for makan beso. Jadi biar makang 1 bulan, 1 biji
roa nyanda mo abis.

Korea jadi pekerja industri. Ta dengar ada tu pendeta
yang pernah di Korea jaga fasilitasi.

Mungkin lewat gereja lebe lancar stou. Maar kua, karna
so ada tu jaga ta lewat ijin tinggal, jadi tre dorang
so awasi ketat.

Japang, sama lei. Disana dorang karja di pabrik deng
kerja laen lei. Banya tou Minahasa (terutama
Kawangkoan, Kiawa, Sonder ada lei Langowan, Minut,
Tomohon) yang tumingkas kasana.
Soalnya pancarian disana tamang bagus. Depe Yen dapa
rasa.

Maar komang, banya lei tu wewene mo tagila-gila lei mo
ka Japang. Ada yang karja di karaoke, maar dorang
sama-sama deng orang Philippine. Tadengar dari tepe
tamang, tu Japang riki tagila-gila pa wewene
Minahasa.

Bayangkan jo, tu Japang, dia riki iko sampe di Manado.
Sewa Kijang kong, suru pi lia rumah di Citraland,
tunjung jo karna dia somo bayar skarang, karna depe
sayang so nya mampu pele. No harga rumah pa om Ci pe
tampa, dapa tako, baba asap depe rupiah. Cuma katu
seimbang deng depe kualitas. Bole tanya pa Sonya
Lasut-SBn dia karja disana.

Padahal ka Japang lei nyanda murah. Skitar 40 ika (1
ika = 1 juta), mulai dari urus surat, paspor, tiket.
Maar karna mantap depe penghasilan, orang tetap baku
rebe. Cuma lei, nya sadiki tu ta kento nyanda dapa
brangkat, karna Japang lei so span depe pengawasan.
Jadi banya yang so status abu-abu, karna so ilegal.

Kalu ka Blanda ta dengar depe informasi dorang mo jadi
perawat di RS atau Panti Jompo.

Cumang komang ini musti perawat yang so berkualitas
dari segi bahasa, minimal fasih berbahasa Inggris.
Ngala jo mo urus ni oma Belanda, kalu cuma komar eiten
banya tahu, maar kalu tu laeng-laeng musti blajar.
Kong depe ketrampilan medis memadai. Jadi musti ada
tambahan pendidikan.

Takira komang, musti ada tu Kawanua Belanda yang
terobos depe jaringan informasi dan birokrasi. Kalu
ini jadi, banya komang tu perawat yang dapa karja di
luar negeri.

Suasana pendidikan :

Kalu soal pendidikan, tu kualitas so nya kala torang
di Manado deng tu di Jawa. Buktinya banya orang torang
yang bole bersaing deng di Jawa.

Maar kalu somo maso universitas, so mulai dapa rasa.
Tu belajar santai pa torang pe mahasiswa dapa lia jo.
Pi kampus cuma banya bacirita. Blajar slow, paya
babaca. Maar ta kira, gejala ini umum terjadi di
Indonesia.

Soal fakultas, tu perguruan tinggi di Manado deng
Minahasa, nyanda kalah juga. Depe dosen-dosen lulusan
luar negeri pe banya. Cuma yang menonjol di fakultas
eksakta. Depe dosen, terutama yang muda-muda masi
manyala-manyala depe master deng doktor.

Maar kasiang di fakultas non eksakta, ado brat komang
mo kase komentar.

Bagimana katu, depe dosen malas mo studi lanjut. Kalu
pun studi lanjut, lebe banya di kandang sandiri.

Biaya tinggi pendidikan :
Bagitu lei kalu mo kuliah, depe biaya so dapa tako. Tu
fakultas favorit di unsrat (kode 01, 02, 06, 07) depe
cigi-cigi doi, jaga beking hosa orang tua.

Sampe dorang kurang bapikir, kase skolah jo di Jawa,
itong-itong lebe murah depe ongkos. Ada tre tu orang
tua jaga bapikir, ni skolah dang cuma for orang kaya.
Sbab depe spp, uang pembangunan deng tu laeng-laeng
babunyi belasan sampe puluhan juta.

Kalu orang tua Cuma petani, atau babajual di pasar
memang maraya.
Kalu stou ja bablante kuda, sapi, bendi atao oto ato
rumah. Nyanda dapa rasa tu 10 atau 20 ika.

Ciptakan lapangan karja

Skarang so klar kuliah, maar mo karja dimana?
Tu lapangan kerja sadiki, orang cari karja rupa bivi.

Dorang bilang ciptakan tu lapangan karja. Anak baru
klar kong somo suru ciptakan lapangan karja?

Doi dari mana for mo ba modal?.

Depe mama deng papa, so takupas-kupas waktu kase
kuliah sampe wisuda.
Sampe disini jadi lingkaran setan.

Penyerapan tenaga kerja dan lepasan pendidikan, nyanda
seimbang depe jumlah.
Kalu ada yang terserap pasti yang depe kriteria paling
mantap.

Bole beking lapangan karja maar yang informal. Bawa
bendi (bakusir), bajual rica, tamate di pasar, bajual
kukis, baolah limbah, batani.

Maar samua ito perlu modal lei biar sadiki.
Ato karja bangunan, karja toko, panjaga mall.

Kong orang mo bilang apa, kase kuliah jadi sarjana
cuma for mo bajual rica tamate di pasar, ato karja
bangunan.

Undang investor :

Pemerentah siapkan lapangan kerja ?
Musti undang investor, terutama yang padat karya.

01 deng amper samua orang pemerenta jaga promosi for
investor maso Sulut. Pokoknya one stop service, sistem
pelayanan satu atap. Bagitu investor maso, tuangali jo
tu meja kote mo lewat akang amper spuluh. Cuma atap tu
satu, maar birokrasi tetap banya.

Investor so maso, waktu mo cari lahan mulai dorang
reno plang-plang.

Banya tanah kosong, maar orang so kapleng. Tu blante
tanah so banya dorang kuasai. Jadi katu tu investor
musti bayar mahal tu tanah.

Pengendalian penguasaan tanah nyanda ada. Sehingga
amper samua tu lokasi bagus so dikuasai orang dagang.

Tu kawasan Kabima, kawasan bisnis, ring road, bos-bos
pe tana samua. Kalu mo ambe depe konpensasi harga so
dileher.

Blum lagi tu pelayanan birokrasi. Sasadiki, minta doi,
bantuan, fasilitas. Blum kamari, so kasana. Baru tu mo
bayar keamanan, mulai dari desa, camat sampe bos-bos
diatas eksekutif-legislatif, ada depe bagian.
Lia jo waktu investor mo ambe alih itu Manado Beach
Hotel. Musti angko pa dorang sampe di Jakarta,
bacirita kong entertainment.

Serta somo baku bayar, ternyata tu tanah MBH ada kote
masalah stou. Ado, bagimana lei bajual aset kong
bagini. Investor lei trus kapo.

Kita jaga iko tu pemberitaan MoU kurang dapa tako mo
dengar. Ada tu tanda tangan dimuka Presiden Philippine
deng Ato, maar nya ada realisasi sampe dunia sekarang.
Sbab depe investor, karong bocor lei kote.

Ada lei tu investor jaga mangaku banya doi. Blum
apa-apa so minta garansi pemda, for minta akang doi di
bank. Cek para cek, makelar kote, maar iyo to depe
penampilan, lalar batera di peda calana, taplisi.

Waktu audiensi deng 01, pokoknya dibantu, maar dibawa
tetap tu baminta ada jo.

Di reklamasi, untung ada tamang-tamang yang brani dan
berhasil. Maar dorang lei, ada babadara kamari,
picya-picya. Jadi pemerenta musti lebe serius kua.

Wangali jo, tu tim ahli ekonomi sobarete-rete, badan
khusus bapikir ekonomi so pe banya, kong mo gagal lei,
lempar handuk jo.

Mo istirahat dulu so manganto, nanti kase sambung.

Pakatuan wo pakalawiren, kita imbaya
Christy manarisip, tuama Minahasa, tole Sonder
Dari sabla kuala Sario, Manado.

Iklan

Tinggalkan Balasan

Please log in using one of these methods to post your comment:

Logo WordPress.com

You are commenting using your WordPress.com account. Logout /  Ubah )

Foto Google+

You are commenting using your Google+ account. Logout /  Ubah )

Gambar Twitter

You are commenting using your Twitter account. Logout /  Ubah )

Foto Facebook

You are commenting using your Facebook account. Logout /  Ubah )

w

Connecting to %s

Kategori

Iklan
%d blogger menyukai ini: